المقامات الشرقية على الجيتار
مش كل السلالم الشرقية أو المقامات ينفع تتلعب على الجيتار بسهولة ودا لأن الجيتار أساساً آلة غربية والأوتار والدساتين متنظمة تبعاً للنظام الغربي. مش معنى كدا ان ما فيش موسيقى شرقي اتعزفت على الجيتار من قبل. فيه اغاني لأم كلثوم زي (إنت عمري) و(فات الميعاد) وغيرهم، الجيتار الكهربائي بيلعب فيهم دور مهم. الفكرة إن فيه مقامات قابله انها تطلع بشكل كويس علي الجيتار حتى لو ما كنش بشكل مثالي. يعني خلينا متفقين إن في جميع الحالات الجيتار مش هيقدر يعبر عن النغم الشرقي بنفس السلاسة اللي آلات زي العود والناي والقانون وغيرهم من الآلات الشرقية الأصيلة هيقدروا يعبروا بيها، بس ممكن نتحايل علي الآلة ونعملها نوع من "التعريب" او "التشريق" بتغيير أسلوب العزف وبكدا هنقرب للاصوات والالحان اللي بنحبها من غير ما نضطر ونتعلم آلة تانية.
مقامات الربع تون
مبدأياً أي مقام شرقي فيه مسافة الربع تون هنستبعده تماماً لأن هيبقى صعب جداً عزفه على الجيتار إلا لو لجأنا لأساليب متقدمة جداً في العزف. فالمقامات زي الراست والصبا والبياتِ والسيكاه والهزام وأي مقام تاني فيه مسافة ربع تون دول هنبعد عنهم إلا لو عاوزين نعزف بشكل ايقاعي بحت فهنا ممكن نمسك "باور كوردز". "الباور كوردز" دي تآلفات خالية عن النغمات اللي ممكن تتعارض مع المقامات اللي فيها ربع تون، وآكيد لازم نراعي درجة ركوز السلم في هذه الحالة بمعنى ان احنا هنمسك التآلف اللي مبني على نفس نغمة الركوز بتاعة سلم المقام، وعلى حسب اتجاه اللحن هننقل من "الباور كورد" لتآلفات أخرى ونكمل على حسب نغمات اللحن. وبردو هنا لازم نبقى ملمين بالإيقاعات زي المقسوم والواحده الكبيرة والملفوف والسنباطي والمصمودي عشان هنبقى بنلعب دور يشبه دور آلات الإيقاع زي الطبلة والرق.
إيه المقامات المناسبة اكثر للجيتار؟
عندنا مقامات أساسية زي العجم والكُرد والحجاز والنهاوند كلهم خاليين عن مسافة الربع تون وبيتعزفوا على الآلات الغربية بدون مشكلة، مع الإعتبار ان المقامات دي لها احساس وصوت مختلف كثير علي الآلات الشرقية اللي هي متصممة بشكل إنها تدي حرية أكثر للعازف في اللعب بالمسافات الصغيرة والعازفين الشرقيين بيستغلوا هذا في عزف العُرب والزخارف اللي هي بتميز العزف الشرقي.
المقامات الشرقية وما يقابلها في الموسيقى الغربية
فيه تشابهات بين بعض المقامات اللي طرحناها والسلالم الموسيقىة الغربية. مثلاً مقام النهاوند يقابل سلم الماينور في الغربي (السلم الصغير، minor) وزي ما النهاوند ممكن يختلف على حسب الأجناس التي يتكوَّن منها فالماينور أيضاً بيأخذ أشكال مختلفة. النهاوند المتكون من جنس نهاوند و جنس حجاز دا يشبه سلم الهارمونيك ماينور (harmonic minor)، ولو جنس نهاوند على جنس كُرد فدا هو سلم الناتورال ماينور (natural minor) او مقام ايوليان (aeolian) اللي هو من المقامات الكنائسية اليونانية القديمة.
الحجاز اللي بيُعزف على الآلات الغربية قريب لصوت الأصل ولكن ما نقدرش نقوله بالظبط لأن الآلات دي محدداه بزيادة. ممكن نقول أن جنس الأصل في مقام الحجاز يشبه تاني تترا كورد (tetrachord) في سلم الهارمونيك ماينور اللي هي مجموعة النغمات اللي بتكون النصف الأعلى من هذا السلم.
مقام العجم إذا تكوَّن من جنس عجم في الأصل وجنس العجم الاعلى في الفرع هيكون قريب لسلم المايجور في الغربي (السلم الكبير، Major) اللي هو نفسه مقام يوناني قديم يسمى أيونيان (Ionian). لو سلم المقام جنس عجم على جنس نهاوند هيبقى قريب من سلم كنائسي إسمه مكسوليديان (Mixolydian).
مقام الكُرد اللي جنس الأصل بتاعه كُرد وجنس الفرع بتاعه نهاوند دا تقريباً مقام غربي كنائسي قديم إسمه فريجيان (phrygian).
فيه مقامات أخرى ما استُخدمتش في الألحان الشرقية كثير زي ما استُخدمت المقامات اللي ذُكِرَت اعلاه، ولكن ابعادها ملائمة للجيتار زي مثلاً مقام نِكريز ونو أثر وصَبا زَمزَم. المقامات دي لها طبع شرقي قوي في الصوت وفي نفس الوقت قريبة لسلم الماينور في الغربي.
أغاني نموذجية
مهم ان احنا نتعرف أكثر على المقامات اللي هنعزفها من خلال تعلُم عزف أغاني ومقطوعات مبنية على هذه المقامات ويستحسن تكون ألحان سامعينها من قبل لأن يجب أن الودن تربط الأشياء أولاً والتحليل ثانياً. لما نيجي نتعلم اغاني مش لازم نمسك أغنية من أولها لآخرها ودا اصلاً هيبقى صعب بالنسبة لأغاني كثيرة في الشرقي لأنها غالباً اللحن بيبقى فيه تنقلات من مقام الى آخر فمشكلة المقامات اللي غير متاحة للعزف على آلتنا هتقابلنا كثير. الأحسن أن احنا يا نختار من الأول أغاني قصيرة ففي الحالة دي غالباً التنقلات مش هتبقى شديدة اوي وهنقدر نعزفها كلها علي بعضها طالاما المقام مناسب، أو ناخد مقطع أو مقطعين فيهم تركيز على مقام واحد مناسب لينا ونسيبنا من باقية الغنوة أو المعزوفة. أنا عملت قائمة من أغاني نموذجية من المقامات اللي ممكن أن تُعزف على الجيتار، ولو تحبوا التابات (tabs) والنوَت بتاعتهم بالكوردات تقدروا تتراسلوا معايا على البريد الإلكتروني وهوفرلكم pdfs فيها الكلام كله. ما قدرتش الاقي أغاني كثيرة معروفة في مقام نو أثر..هل فيه حد يعرف نماذج أخرى من هذا المقام؟ :)
