أفضل جيتار كهربائي للمبتدئين
بقالك فترة بتلعب علي الجيتار الكلاسيك وآخيراً جه الوقت انك تنقل علي الجيتار الإلكتريك، صح؟ ولا دي أول طلعة ليك وما فيش إلا الجيتار الكهربائي اللي هيمزجك؟ في الحالتين آكيد عاوز فكرة عن إيه الحاجات اللي موجودة في السوق وبنتكلم في حدود كام كأسعار. ولا يهمك، إحنا شوفنالك إيه أحسن موديلات جيتارات وأمبات معروضة وحاولنا في إختيارتنا نوفق بين السعر والجودة.
ملحوظة سريعة: هنتكلم عن الحاجات اللي موجودة في السوق المصري بالتحديد فطبعاً مش شرط ان الكلام دا هينطبق علي باقية الدول اللي في المنطقة، بس آكيد فيه معلومات هتبقي مفيدة في جميع الأحوال.
نستبعد إيه؟
أولاً خلونا نستبعد فقة من الجيتارات بقت منتشرة في السوق والحقيقة من اللي انا شوفته خساره فيها أي مبلغ. الجيتارات الصيني اللي بيبقي سعرها في حدود الألف أو الألف ونصف جنيه مصري دول غالباً متصنعين من خامات رديئة ولا يصلحوا للعزف أو للتعلم. عاوز اوضح اني مش قصدي علي الجيتارات الصيني بشكل مطلق لأن فيه جيتارات متصنعة في الصين كويسة جداً ومقبولة جداً في العزف. هنا بنتكلم عن الجيتارات الكهربائية بالتحديد مش الكلاسيك ولا الأكوستيك لأن دول وضعهم مختلف.
الجيتار المناسب
بالنسبة لمصر أو القاهرة بالتحديد، بقي فيه انواع كويسة متوفرة للمبتدئ منها الCort. Cort شركة كورية وإسم في عالم الجيتارات، وغير إنها بتقدم منتج يناسب كل المستويات والميزانيات، هي متميزة بالمنتجات المقبولة اوي بأسعار ظريفة. مثال لدا هو موديل الG100 بتاعهم. الG100 جيتار معمول من خامات كويسة والناس بتشكر فيه وسعره حالياً ٢٤٠٠ جم في محلات Distingo.
نيجي بعد كدا للجيتارات الSquier ودا إسم معروف وجزء من عائلة Fender اللي هي من أكبر وأقدم الشركات اللي بتصنع جيتارات وأصلها أمريكي. فيه كذا نوع من الSquier والراينج واسع بس اللي هيلبي اغراض المبتدئ هو الSquier Bullet وميزته انه مطلوب في السوق المستعمل فلو الشخص مش عاوز يكمل في الموضوع، الBullet ممكن يتباع من غير خسارة جامدة. دا متوفر حالياً عند محل عادل صقر في المعادي جديد بحوالي ٢٦٠٠ جم.
عاملين بردو حاجة حلوه للأعمار الصغيرة اللي هو الSquier Mini. نقطة لازم تتحط في الحسبان ان الجيتار العادي ممكن يبقي حجمه كبير اوي علي اللي سنه صغير وجسمه لسا ما فردش، ولو جاب الحجم العادي فدا ممكن يصعب عليه تعلم الآلة. الMini حجمه صغير وفي نفس الوقت إمكانياته كويسة جداً لدرجة إن فيه محترفين كبار بيشتروه عشان وزنه خفيف وسهل في السفر. الSquier Mini تقريباً متصمم زي الBullet علي شكل الStratocaster، ودا الموديل التقليدي بتاع فندر. الMini موجود في الأسواق بنفس سعر الBullet.
جيتارات الEpiphone نزلت السوق بقوة في الفترة اللي فاتت، وزي ما Squier تبع شركة Fender، فEpiphone تبع شركة Gibson ودي من أول الشركات اللي نزلت جيتار كهربائي في السوق من أكثر من ٨٠ سنة! انا معايا واحد جايبه من كذا سنه وبحب العب عليه، بس فيه ناس كثيرة بتشتكي من اللي نزل في السوق في الفترة اللي فاتت وان فيه عيوب جامده في المصنعية. الميزة ان محلات Distingo مثلاً بتوفر package او توليفة فيها جيتار وأمب (الإثنين Epiphone) والأساسيات اللي محتاجها المبتدئ وكلها علي بعض ب٤٥٠٠ جم. بس الفكرة ان الأمب ممكن يبقي مستواه مش حلو اوي مقارنتاً بأمبات تانية في نفس الراينج.
فكدا ممكن نقول ان الCort G100 والSquier Bullet مناسبين جداً للمبتدئ والSquier Mini مناسب للسن الصغير وسعر الآلة في حدود ٢٤٠٠-٢٦٠٠ جم.
الAmp اللي نشتريه يكون إيه؟
بالنسبة للجيتار الكهربائي بالتحديد، الأمب أو مضخم الصوت دا يعتبر جزء أساسي عشان صوت الجيتار يبان فعلاً. احنا تقريباً استبعدنا أمب الEpiphone اللي بييجي في التوليفة بتاعتهم، والFender Frontman 10G مع انه صغير جداً ودي ميزة في حد ذاتها، ما يستهلش اوي ال١٣٥٠ جم اللي مطلوبين فيه. دا ببساطة لأن فيه حاجات احسن في نفس راينج السعر.
الCort CM15R أمب جميل جداً بالنسبة لسعره وحجمه مناسب للتمرين في البيت وكمان وزنه خفيف فسهل في التنقل. عنده gain channel اللي هو مسار تاني للصوت فممكن نقلب صوته علي حاجه روك اند رول أو بلوز أو هارد روك، وفيه reverb أو إفيكت صدي صوت ظريف. ناس كثيرة بتشكر فيه ومعروض في محل عادل صقر بسعر ١٤٠٠ جم.
شركة Blackstar عاملين الDebut 10 ودا أمب صغير بس شديد. الأمب دا ١٠ وات لكن شغال في التمرين في البيت وبيدي اختيار في تغيير نوع الأمب من أمريكاني زي أمبات الFender، لإنجليزي زي الMarshal وسعره ١٢٥٠ جم عند جوهرة الفن في مدينة نصر.
وعشان ما نزعلش الناس بتوع فندر مننا ففي بدل الFrontman 10G أمب Fender Champion 20 ودا آكيد احسن بكثير من الFrontman 10G وفيه إفيكتس أو مؤثرات صوتية أكثر من الCort CM15. دا بردو مناسب للتمرين في البيت وممكن يتاخذ لبروفة أو حتي حفلة صغيرة وفيه مداخل لوصلة aux وسماعات headphones عشان تلعب براحتك بدون ما تزعج اللي حواليك. الChampion سعره في Distingo ٢٤٥٠ جم.
إضافات مهمة
أوعي بقي تمشي من المحل قبل ما تجيب كام حاجة إضافية زي الشنطة والكابل والبيك (الريشة) عشان تعرف توصل وتنطلق علي طول. الشنطة مهمة لأن هي اللي بتحمي الجيتار وبالذات في الجو اللي فيه تراب وممكن البياع يديهالك هدية لو عنده. فيه ناس بتدي كابلات مجاناً مع الجيتار، بس عامتاً بتبقي غير مقبولة في العزف لأنها بتزن جامد جداً. الأحسن نجيب كابل مركة زي Fender عشان نضمن إنه يعيش وما يتعبناش في الصوت. الكابلات الكويسة بتبقي نسبياً سميكة وبتبقي ما بين ١٥٠ و ١٩٠ جم.
العدة بإختصار
يعني بإختصار اللي عاوز يبتدي يتعلم جيتار كهربائي ممكن يجيب جيتار زي الCort G100 او الSquier Bullet او الMini للحجم الصغير، ويجيب معاه أمب يا CM15 يا Blackstar يا Fender Champion 20 وياخد شنطة كويسة علي كام ريشة ويجيب كابل كويس معاهم. دا كدا يحطنا في راينج ٣٨٥٠-٥٢٥٠ جم. لو دا مش متاح، فالأحسن إن البداية تبقي علي الجيتار الكلاسيك أو حتي الأكوستيك لأن الموضوع هيبقي أوفر. ممكن تشوف الفيديو اللي تحت لو عاوز تشوف الحاجة قدامك وتسمع الفروقات بين الآلات والأمبات.
